Музейбыт экспонаттара, библиотеката эбиллэ турар

Өссө биир экспонат 75 сыллаах үбүлүөйдээх сылбытын арыйар күммүтүгэр киирдэ. Быһа холоон 1950-60 сс. оҥоһуллубут хаарыс былааты коллекционер Варвара Дмитириевна Попова бэлэхтээтэ. Кини бу былааты Үөһэ Дьааҥыттан Старостина Галина Илларионовнаттан 2020 сыллаахха ылбыт.

Саха АССР үтүөлээх учуутала Виктор Семенович Алехин олоҕун, үлэтин-хамнаһын сырдатар кинигэни дьоһун бэлэх оҥордулар. Учуутал үрдүк аатыгар сүгүрүйэн үөрэнээччилэрэ, коллегалара,аймахтара суруйбут ахтыылара киирбиттэр. Дьоһун бэлэҕи аймаҕа Кириллина Виктория Ивановна туттарда.

“Байбал тэлбит суолунан” альбом-кинигэни автор бэйэтэ – фотограф, суруналыыс, Чурапчы нэһилиэгин бочуоттааҕа Г.Г.Турантаев бэлэхтээтэ. Бу хаартысканан дьүһүйүүтүгэр Олимпийскай чемпион Павел Павлович Пинигины уонна 2018,2023 сыллардааҕы Тарскай бирииһин турнирдарын үйэтиппитэ киирбиттэр.

“Чурапчы үйэттэн үйэҕэ” диэн Чурапчы нэһилиэгэ 375 сыллаах историятын, сайдыытын сырдатар кинигэ музейбыт библиотекатыгар киирдэ. Маннык олус туһалаах, үйэлээх кинигэлэммиппитигэр нэһилиэк салалтатыгар, кинигэ автордарыгар улаханнык махтанабыт!