Олунньу 2 күнүгэр улуус дьаһалтатын аактабай саалатыгар Аҕа дойду Улуу сэриитин бэтэрээнэ, СР “Хотугу сулус”, “Албан аат” III – с истиэпэннээх орденнар кавалердара, Саха АССР үтүөлээх учуутала, Былатыан Ойуунускай аатынан СР государственнай бириэмийэтин лауреата, Чурапчы улууһун, Чурапчы, Болугур нэһилиэктэрин бочуоттаах гражданина И.М.Павловы кыттаа История сылын саҕалааһынын чэрчитинэн көрсүһүү буолла. Көрсүһүүгэ улуус дьаһалтатын салайааччылара, кыраайы үөрэтээччилэр, улуус музейдарын, библиотекаларын үлэһиттэрэ, история учууталлара үөрэхтээһин управлениетын специалистара кыттыыны ыллылар.Чурапчытааҕы музей директора Ю.Толстоухов ааспыт Музей сылын сүрүн хамсааһыннарын, туох үлэ барбытын сиһилии кэпсээтэ.

Улуустааҕы үөрэх управлениетын начальнигын солбуйааччы Е.Егорова саҥа История сылын концепциятын ис барылын толору билиһиннэрдэ, История сыла ааспыт Музей сылын салҕыыр ситимнээҕин эттэ, сиһилии ырытан кэпсээтэ. Үөрэх управлениета История сылын сүрүннээччинэн ананан концепцияҕа хас да хайысханан сыал-сорук туруоруллан сыл устата киэҥ далааһыннаах үлэ ыытыллыахтааҕын туһунан иһитиннэрдэ.
Иван Михайлович иһитиннэриилэри болҕойон истэн кэккэ боппуруостары, сүбэлэри – амалары биэрдэ, элбэҕи кэпсээтэ, улуус историятын түҥ былыргыттан хасыһан, чинчийэн үөрэтиҥ диэн тус санаатын эттэ. Ытык кырдьаҕас: “Историяҕа сыһыаннаах хайа баҕар мунаарар боппуруостаах буоллаххытына ыйыталаһар буолуҥ, төһө билэрбинэн, тута да буолбатар эппиэттиэм”- диэн этиинэн кэпсээнин түмүктээтэ. Көрсүһүүгэ мустубуттар Иван Михайловичка бары үтүөнү баҕаран туран, махталларын этэн тарҕастылар.